Faleminderit, nënkryetare! Në faqet e internetit të ministrive vendimet nuk publikohen në rregull ose fare. Përgjatë hulumtimit për vendimet e caktuara që janë përmendur nëpër media, kemi hasur në vështirësi e pamundësi për lokalizimin e tyre. Nuk publikohen shumë vendime, përfshirë edhe ato për emërimin e stafit të ministrave, këshilltarëve e tjerë. Shembull, vendimi i fundit i publikuar në ueb faqen e Ministrisë së Bujqësisë, Pylltarisë dhe Zhvillimit Rural është i datës 15 maj 2020. Kjo bie në kundërshtim me parimin e transparencës për qeverisje të mirë. Kërkoj të na tregoni arsyen pse nuk përmbushet ky obligim i Qeverisë? Po ashtu, zoti Hoti, premtuat në konferencë për media të datës 28 shtator, pas mbledhjes së Qeverisë, se në po të njëjtën ditë pasdite do të publikohen në ueb faqe të Zyrës së Kryeministrit të gjitha marrëveshjet me Shqipërinë, sot jemi më 12 nëntor dhe asnjë e tillë nuk është publikuar.