Marrëveshja e Parë për Normalizimin e Marrëdhënieve e cila u nënshkrua nga Kryeministri i atëhershëm i Kosovës z. Hashin Thaçi dhe Kryeministri i atëhershëm i Serbisë z. Ivica Daçiç me 19 Prill 2013. Plani i zbatimit të tij u dakordua midis palëve me vënien e inicialeve të tyre më 21 Maj 2013. Kjo marrëveshje trajton parimet e përgjithshme që trajtojnë formimin dhe kompetencat e asosacionit/bashkësisë së komunave me shumicë serbe, ku element i rëndësishëm i kësaj marrëveshje është denominimi i dyfishtë i termeve të përdorura. Kjo marrëveshja parasheh gjithashtu shpërbërjen e strukturave serbe të sigurisë ne veri, krijimin e një policie regjionale për katër komunat e veriut. Gjithashtu element tjetër që trajtohet në këtë marrëveshje është integrimi i gjykatave brenda sistemit të drejtësisë së Kosovës në pajtim me kornizën ligjore të Kosovës, ku në kuadër të gjykatës së apelit në Prishtinë do të krijohet një panel me shumicë Serbe për rastet e komunave Serbe të veriut. Përpos panelit më shumicë Serbe parashihet krijimi i një divizioni të Gjykatës së Apelit në Veri. Kjo marrëveshje përcakton gjithashtu krijimin e komunave ligjore në Kosovë, organizmin e zgjedhjeve komunale në veri në janar të vitit 2014, parimin e financimit transparent, intensifikimin e diskutimeve për Energjisë dhe Telekomit, si dhe dakordimin për mos bllokimin e njëra-tjetrës apo nga palët e treta për rrugëtimin drejt BE-së. Plani i zbatimit u dakordua nga palët me 21 maj 2013. Ai përmban hapa konkret dhe parimet e përgjithshme për të dyja palët, përkatësisht për komisionin zbatues për zbatimin e marrëveshjes së parimeve të 19 Prill 2013. Planin i zbatimit përmban 6 elemente kryesore përkatësisht: i) Përshtatja e kornizës ligjore; ii) Asosacioni/bashkësia; iii) Policia; iv) Drejtësia; v) Zgjedhjet lokale dhe vi) Provizione të përgjithshme.

Marrëveshja për telekomunikacionin, që njihet edhe si marrëveshja për kodin telefonik, është arritur më 8 Shtator 2013 mes Hashim Thaçit dhe Ivica Dacic. Kjo çështje është përmendur edhe në marrëveshjen e parë për normalizimin e marrëdhënieve në mes dy vendeve (19 prill 2013). Më 25 gusht të vitit 2015, pala kosovare dhe ajo serbe u dakorduan edhe për planin e veprimit mbi marrëveshjen për telekomunikacion. Sipas kësaj marrëveshjeje, të dy palët janë dakorduar që Kosovës do ti ndahet një kod telefonik 3-shifror nga ITU (Unioni Ndërkombëtar i Telekomunikimeve UNT). Kjo marrëveshje gjithashtu shpreh dakordësinë e palëve për të arritur një marrëveshje teknike për harmonizimin e përdorimit të spektrit GSM, sinjaleve televizive përfshirë transmetimet digjitale tokësore. Si dhe synohej lehtësimi i procesit të interkoneksionit dhe marrëveshjes roming midis operatorëve të të dy palëve për të ulur kostot për qytetarët.

Marrëveshja për revitalizimin e Urës së Mitrovicës dhe rrugës kryesore (rr.Mbreti Peter) u arrit me datën 25 gusht 2015 nga Kryeministri i Republikës së Kosovës z. Isa Mustafa dhe Kryeministri i Republikës së Serbisë z. Aleksandar Vucic. Palët u dakorduan që të bëhej rivitalizimi i Urës dhe hapësirës përreth në bazë të planit arkitekuror të dakorduar mes tyre më 29 Qershor 2015. Parashihej që ura të hapej për qarkullim si dhe komuna do të rivitalizonte rrugen kryesore (rruga Mbreti Peter) në zonë për kombësorë. Me këtë marrëveshje u përcaktua që do mbikqyrej në mënyrë të rregulltë aspekti politik dhe i sigurisë gjatë procesit të rivitalizimit të urës, si dhe do të përcaktohej periudha kur hartat e linjave administrative të zonave kadastrale në Suhodoll/Suvi Do dhe Kroi i Vitakut/Brdjani do të zgjidheshin përmes Memorandumit të Mirëkuptimit për Planet Zhvillimore Komunale, Hartës se Zonimit Komunal dhe Planit Rregullues të Detajuar nga ministritë relevante dhe dy komunat. Më 5 Gusht 2016, palët u ritakuan për shkak të moszbatimi të marrëveshjes dhe u dakorduan në marrëveshje të re e cila u emërtua si plani i BE-së për implementimin e marrëveshjes për Urën në Mitrovicë, e cila cilësoi Urën e Mitrovicës si simbolin e normalizimit të marrëdhëneive mes serbëve, shqiptarëve dhe komuniteteve të tjera të Kosovës duke lehtësuar kontaktet, shkëmbimet dhe mirëkuptimin midis qytetarëve në të dy anët e qytetit. Sipas kësaj marrëveshjeje u dakordua që leja e ndërtimit të fillonte me 14 gusht 2016, sipas së cilës ura e Mitrovicës do të hapet për këmbësorë dhe automjete në të dy drejtimet. Periudha kohore e përcaktuar me këtë marrëveshje për hapjen e Urës për qarkullin të plotë është 20 Janar 2017. Në të njëjtë periudhë kohore, pritet që Rruga e Mbretit Petar të rivitalizohet në zonë për këmbësorët nga komuna e Mitrovicës së Veriut.

Marrëveshje rreth sigurimit të automjeteve u arrit deri më 23 qershor të vitit 2015 në mes të përfaqësueses së Kosovës znj. Edita Tahirit dhe përfaqësuesit të Serbisë z. Marko Djuric në prezencën e dy kryeministrave. Megjithatë, kjo çështje ishte përfshirë në marrëveshjen për lirinë e lëvizjes e cila u arrit më 2 korrik të vitit 2011 ku zgjidhje kalimtare përcaktohej se secila palë do t’iu mundësojë qytetarëve të palës tjetër blerjen e polisave të sigurimit kufitar. Ndërsa, me ndihmën e BE-së palët do të vazhdonin të punonin për një marrëveshje komerciale për sigurim reciprok të automjeteve. Me 23 qershor të vitit 2015, u arrit një Memorandum i Mirëkuptimit për “Njohjen Reciproke të Sigurimit nga Auto përgjegjësia për Palët e Treta (TPL) dhe marrëveshje për procesimin dhe pagesën e kërkesave” ndërmjet Shoqatës së Sigurimeve të Serbisë (SHSS) dhe Byrosë Kosovare të Sigurimit (BKS) me lehtësimin e Këshillit të Byrove (KB) (përgjegjës për rregullimin e kartonit të gjelbërt ndërkombëtar).

Më 7 tetor 2013 marrëveshja për vizitat zyrtare reciproke ishte arritur parimisht mes ish kryeministrit të Serbisë Ivica Dacic dhe ish kryeministrit të Kosovës Hashim Thaçi, ndërsa u finalizua më 14 nëntor të vitit 2014, mes përfaqësueses së Kosovës znj. Edita Tahirit dhe përfaqësuesit të Serbisë z. Marko Djuric. Përmes kësaj marrëveshjeje palët u pajtuan që zyrtarët ndërlidhës përkatës të vendosur në Prishtinë dhe Beograd të merreshin me procedurat dhe detajet e vizitave. Në tekstin e marrëveshjes u përcaktuan zyrtarët të cilët duhet të bënin kërkesë për të realizuar vizitat si dhe modalietet e trajtimit të këtyre kërkësave. Kjo marrëveshje filloi të zbatohej më 1 dhjetor 2014.

Palët negociatore me 7 nëntor 2012 janë pajtuar në Bruksel për arritjen e marrëveshjes për caktimin e zyrtarët ndërlidhës në mes të dy vendeve. Në Raundin e 3 të bisedimeve në Bruksel me 4 dhjetor 2012, dy kryeministrat janë dakorduar për të emëruar nga një zyrtar ndërlidhës duke u përkrahur nga BE. Kjo marrëveshje nuk filloi të zbatohet deri në fund të vitit 2014, ku me 1 dhjetor 2014 u bë edhe vendosja e Zyrtarëve Ndërlidhës në Prishinë dhe Beograd. Synimi i zyrtarëve ndërlidhës ishte përmirësimi i marrëdhënieve në nivel institucionesh në mes dy vendeve dhe vendosja e komunikimit. Zyrtarët Ndërlidhës kanë përgjegjësin e menaxhimit të kërkesave për vizita zyrtare.

Marrëveshja për regjistrat civil është arritur më 2 korrik të vitit 2011 në raundin e pestë të bisedimeve mes zëvëndës kryeministres së Kosovës znj. Edita Tahiri dhe ish zyrtarit të Ministrisë së Punëve të Jashtme, z. Borco Stefanovic. Sipas saj, një komitet trepalësh i kryesuar nga EULEX, do të formohej për të identifikuar zbrazëtirat në librat amzë origjinal të para vitit 1999 të cilat mungojnë. EULEX-i parashihej që të vërtetonte kopjet e librave amzë nga Kosova, komunë pas komune dhe do ti procesonte kopjet e vërtetura për të krijuar një regjistër plotësisht të besueshëm në Kosovë. Ministria e Dialogut në muajin Mars të vitit 2015 ka konstatuar se zbatimi i kësaj marrëveshje është përfunduar me sukses.

Marrëveshja për shënimet kadastrale u arrit në raundin e gjashtë të bisedimeve të mbajtur më 2 shator 2011 në mes zëvëndëskryeministres së Kosovës znj. Edita Tahiri dhe ish zyrtarit të Ministrisë së Punëve të Jashtme, z. Borco Stefanovic. Me anë të kësaj marrëveshje palët u pajtuan që, të bëjnë çdo përpjekje për të vendosur një kadastër plotësisht të besueshëm në Kosovë me qëllim për të mbrojtur të drejtat e njerëzve me kërkesa legjitime në pronë. Sipas marrëveshjes, Serbia do t’i kthente Kosovës, përmes Përfaqësuesit Special të BE-së (PSBE), kopjet e skanuara të shënimeve kadastrale të marra para vitit 1999. Një agjenci teknike, përkatësisht Agjencia Kosovare për Krahasimin dhe Verifikimin e Pronave (AKKVP) do të ishte përgjegjëse që të identifikonte, krahasonte dhe raportonte zbrastësirat në shënimet kadastrale origjinale të para vitit 1999 me kadastrën e ri konstruktuar të Kosovës.

Marrëveshja për vulat doganore u arrit në raundin e gjashtë të bisedimeve në Bruksel, më 2 shtator të vitit 2011, në mes zëvëndëskryeministres së Kosovës znj. Edita Tahiri dhe ish zyrtarit të Ministrisë së Punëve të Jashtme, z. Borco Stefanovic. Kjo marrëveshje përcakton që palët duhet të bëjnë çdo përpjekje të mundshme për të siguruar qarkullimin e lirë të mallrave në përputhje me marrëveshjen e CEFTAs. Gjithashtu përfshihet edhe pranimi i vulave doganore me mbishkrimin “Dogana e Kosovës” në të gjitha dokumentet dhe komunikimit përcjellëse.

Marrëveshja për mbledhjen e të hyrave doganore u arrit në janar të vitit 2013 në Bruksel në mes Kryeministrit të atëhershëm të Kosovës z. Hashim Thaçi dhe Kryeministrit të atëhershëm të Serbisë z. Ivica Dacic. Kjo marrëveshje parasheh mbledhjen e të hyrave doganore nga autoritetet e Kosovës në dy pikë-kalimet kufitare të veriut Jarinje dhe Bërnjak. Kjo marrëveshje poashtu rregullon edhe modalitetet për lirimin e mallërave në këto dy pikë kalime duke specifikuar se për të përfituar nga taksa doganore, ndërmarrjet që operojnë në në Leposaviq, në veri të Mitrovicës, Zubin Potok dhe Zveçan duhet të jenë të regjistruara si kompani sipas ligjeve të Republikës së Kosovës. Marrëveshja parasheh gjithashtu edhe krijimin e një Fondi Zhvillimor (që këtej e tutje Fondi) për të promovuar zhvillimin social-ekonomik dhe për të mirën e popullsisë lokale në Leposaviq, në veri të Mitrovicës, Zubin Potok dhe Zveçan.